इ चितवन खबर

August 28, 2026

चितवन। चितवनको भरतपुर–६, गीतानगरस्थित शहीद गणेश स्वास्थ्य चौकीमा एकदिने आँखा शिविर सञ्चालन हुने भएको छ। नेपाल नेत्रज्योति संघ, भरतपुर आँखा अस्पताल चितवन, लाइन्स क्लब अफ चितवन एक्सपर्ट युथ र शहीद गणेश स्वास्थ्य चौकी गीतानगरको संयुक्त आयोजनामा शिविर हुन लागेको हो।

आँखा शिविर भाद्र १६ गते मंगलबार बिहान १० बजेदेखि दिउँसो ३ बजेसम्म शिविर सञ्चालन हुनेछ। शिविरमा मोतियाविन्दु लगायत विभिन्न आँखा सम्बन्धी समस्या भएका बिरामीहरूको आँखा परीक्षण तथा आवश्यक परामर्श प्रदान गरिनेछ।

विशेषगरी मोतियाविन्दु भएका बिरामीलाई लक्षित गर्दै सञ्चालन गर्न लागिएको शिविरमा जाँचपछि शल्यक्रियाका लागि छनोट भएका मोतियाविन्दुका बिरामीहरूको भरतपुर आँखा अस्पतालमा निःशुल्क शल्यक्रिया गरिने आयोजकले जनाएको छ।

आँखासम्बन्धी समस्या भएका सबैलाई समयमै स्वास्थ्य चौकीमा उपस्थित भई आँखा जाँच गराएर शिविरको अवसरबाट लाभ लिन आयोजकले अनुरोध गरेको छ। कार्यक्रमका संयोजक राजेश शर्मा आचार्य रहेका छन्।